Dis is how tings mighta go down.
Yorke realisin de team in trouble. It could do plenty better dan it doin and there is a good chance to make de Hex if we stop de forkin around.
After de US game...Jack and dem shoppin fuh a name coach but nobody want to step een dis situation because it eh lookin too promisin. Everybody who available want MEGA $$$ fuh de nex 3 games and sayin dem want guarantees dat if de team doh make de Hex....dey still colleckin dey pay. On top a dat, dey want MORE $$$ if de team DOES make de Hex. Jack cuss all a dem....so we back to square one.
Yorkie say...well...ah could talk wit Latas. Jack see $$ signs one time. It have 2 home games left....Latas & Yorke togeddah would guarantee sell out fuh both. Plus if Kenwyne comin back....daz a chance to raise ticket prices to $500 fuh grounds.
Anna talk wit Latas but Latas bawl me eh comin back jes so. I want a coachin wuk. Yorke tell Latas....doh study it hoss....dat done taken care of. Dah imps Maturana done. He go jes be a figurehead anyway. All de REAL coachin go be done by you. He jes want to colleck he paycheck so he eh rockin no boat...plus you could do all de interviews and ting.
Latas - You know me eh no lyrics man so dah interview ting is small ting to me. Buh wha bout Anton?
Yorkie - Wha bout Anton? None a we does lissen to he anyway so it doh matter. Dis eh de U 17 team yuh know.
Latas - Scene. How much we talkin about anyway?
Yorkie - Name yuh price. Remember is Jack we dealin wit.
Latas - Arrite...well as long as Jackula could promise meh de head coach wuk after dese 3 games, I go fall een. Of course...u go be meh assistant coach. It go be like ole times. Ah could even take a lil 10 mins if need be if dem boy playin de ass.
Yorkie - Breds....de way how dem fellas playin, you need to hit de gym NOW. You might have to play a half at least!
Latas - Steupes.....gym? De only Gym I hittin is if it have a gyul or a bottle name so.
Yorkie - Easy breddrin....yuh is a national coach now. Anyway....ah go tell Jack de good news and ah bet yuh he go mek you a FIFA Ambassador and gi yuh a diplomatic passport jes like me fuh dat!
Latas - Me eh ask fuh it but me eh go refuse it needah. Oh one nex ting ah insistin on. Birchall have to play. Yuh know you ole, I ole, and de ress a dem yute doh like to wuk hard so mek sure dah white boy on de team or me eh comin no way eh.
Yorkie - Fuh real! Consider it done horsie. Plus....all dem ting in Zen & 51 go be happy he back een de mix and yuh know once dem happy, ALL A WE HAPPY!