I from Moruga (well meh muddah from dere and ah live down dey for a 1 or 2 years) ..
Dis talk about hickie is a big conspiracy perpertrated by the brethen of soucouyant to hide their prescence in T&T.
I know for a fact dat soucouyant is for real. She use to bite my sister (who was only 7 years old and was not getting hicke from anybody). I see fus hand de black and blue bruise. An ah sure I see a fireball one nite.
Allyuh and the remedy for hickie get side track from Kandi origina post... proof again dat the soucouyant is for real.  Hmmmm.... ah tink somebody here is did post mite be a soucouyant ore related to one.
As for MuffPuff and the Navy Blue Book ... leh me leave dat to yuh imagination
pecan meh fadda side ah family from LaLune...
dat is where we use to spend we august err excuse me ah mean summer holidays
ya ever see bout 10 children sleep on one bed - well just give we ah story bout dwen and soucouyant nah.
ah saw ah umm what ya does call dem oman who have one foot and dey other is ah cow hoff (lajabless or something so)
well me and meh brother was walking home one night in LaLune from meh aunty house to meh grandmudda bout 7 dey night...now ya hafta remember no street lights only dey moon.
aye aye meh brother turn round and tell meh look ah old woman following we from ah distance. i turn roun tur see if we know she. we didn't so me ain't dig nothing.
all of ah sudden he turn round again and say look she almost reach we. time i turn round dey woman bout 8 steps behind we...ah say to meh self but she old no ass how she reach up so fast to we. man ah hold on to meh brother hand and is take off we gone yes. i honestly believe meh brother foot ain't touch asphalt yet...Ato had nothing on we dat night.
ya know by dey time we reach infront we grandmudda big gate and run up dey steps, dat woman was passing dey gate and laughing.
she had on ah long white skirt but ya coulda see she had ah hoff. when we tell we grandmudda wha happen, she say dat woman does rome round dey place looking for "boy" children to take dem in the forest. she make we say 3 our fadda and send we to bed.
honest to dey almighty dat is ah true story.
ah miss dem days bad.
allyuh tink dem young birds in this generation have stories like this ? Â