Yuh see dis tread?
Ah pass een here and peep once or twice and ah shake meh empty head and slip back out same way. Ah say dis is ah man tread, I have no place in here, let me take meh mout, close it and go and make joke in a nex tread.
But dis afternoon ah feeling lil mischevious. Ah come now to akse all yuh someting.
What is yuh definition of ah "BABE"?
I seeing some snap here of some wimmen...lawd...all yuh SURE is ah woman? Ah not calling de poster name eh? But it have one up so wid a snap of a girl ah akse mehself if dat fella does wear glasses and it fall awf when he pick dat snap.
Now ah know some of all yuh going to say how ah jealous, how I must be ole and hugly, cah fine ah man, dotish, doh have meh own front teet, all kine ah ting, but is not dat.
Women does look at udda women too. Doh doubt meh. We looking to see de outfit to eidda buy one so, promise weself NEVER to buy one so, checking maekup, shoe, hair do, looking fuh tips to try, tips on what NOT to try...tings like dat. Some women does be checking out de competition.
As fuh me. I look because is part of meh job too. No doh laugh. Is troot. Ah does take snap and ting...and ah not jes looking at meh Trini girls or meh Black wimmens, meh eye looking fuh certain aspeck.
So far ah have to hand it to who ever post dat snap of Eva Mendez, she near de top of de liss and one or two who name I ent know...but it have plenty more all yuh ent call yet...
ah going an' haul up meh girdle, put een meh plate and put on meh bi focal and check back later.
Ah might start a "Hunk" tread if all yuh antagorize meh...