*steupse*
Is only when ah see he watching me funny dat ah ketch mehself and stop. He laugh at me. Shims.
Before I had deze two zwill yuh girl was Miss Thang. Wearing nice dan dan, meh head do, nails do. Now see me like Mary Jackass toting wipes, diapers, sippy cup in a blasted big bag like ah going to make market. Clodes clean yes but ah fraid to wear white in case madam decide she dutty hand MUSS plaster on meh bodice or mister decide he HAVE to play in de dutt and den hug me.
And de udda day I ALONE in de house, de huzzy take he two chirren to give mummy a break. I ALONE man and see me sit down watching Sesame Street like a big ole fool. When I realize I could be watching someting intelligenk or going to take a quiet bath man ah start to cuss! Shims...
I hope dem doh put me in no ole people home eh because all dis I doing here, when I dead ah coming back to pull dey foot when dey sleeping.