Well yesterday was a great day for me and the other members of de Warrior Nation.
We were followed by a film crew from ITV 1, we did a radio interview with BBC Stoke and we were also interviewed by a stoke newspaper as well as being photographd by the Official Port Vale club Photographer.
We met in the New Pub in Brentford West London between 11:30 and 12:00 pm. Scoapro, TriniWhiteBoy, FL! and myself. We bus ah lime with some PortVale fans and tease dem about de cut arse we putting on England.
Dem fellas tell me doh be ridiculous we getting between 4-6 from England.
but ah explain dat we have ah plan...we paying fuh 3 old whores fuh Rooney..each ah de hoes between de ages of 60-65. it all over de papers here dat he like hoes..and old ones at dat. Dem fellas real laff at dat..and ah tell dem we does call him Shreck..dat get dem laffing too.
Anyway we do ah little interview..FL!, me and Socapro with de TV crew. and den we meet de North london Vale supporters.
We leave and walk down de road and dem TV men running in front ah we..if allyuh see people wondering who de ass we is..LOL.
We reach de Brentford grounds and we meet Phil Bowers from BBC Stoke and he tell we dat de Port Vale bus coming and dat we meeting Birchall fuh ah jersey presentation as de Port Vale Chairman send ah shirt fuh meh, and dat Chrissy go sign it.
We meet up with Birchall and he say hello tuh we..we exchange jerseys and den we pose fuh ah few Pictures. De radio man do ah little interview with me and den we talk tuh ah reporter from de Port Vale papers.
We den went back tuh de pub and lime ah few with more Vale supporters.
Check dis eh, we walking around in Red white and Black..dem is flicking Brentford colours...and we supporting Port Vale. No horrors!
When we go in de grouds ah meet ah African fella and he say he from cameroon. de fellas was real serious at first until socapro tell de man he only vex becasue he side eh make it tuh de world cup. Is den ah res pure fatigue on he arse.
we gone in de stands and if yuh see de type ah food dem english people eating...Steak and kidney pie. it look like dey use some cancerous kidney tuh make dat ..weys...and de sauce in dat black, black black! and de hamburger look like it make with mystery meat..ah never see nutten look like dat before. Ah make ah man hold he own open and take ah picture ah he burger oui. Ah eh go lie..dat ting look nasty too bad.
Now we set up we banner, and socapro unwrap ah Trini flag and we hang dat up in se people grouds..like if is ah T&T game we come tuh watch.
If yuh see vale fans dat come by we and lime. Ozzie (ah Vale fan)wanted to hold one end ah de banner! Ah did try teaching dem fellas tuh sing Port Vale we want ah goal...but dey watch mh like ah mad. FL! only laffing like ah damn mad man. And ah keep asking ah young girl what de hell is Minge Pie! and what does ah want ah bit ah kipper mean. She only laughing and running away.
Somewhere in de middle ah all dat Port Vale score after dominating much ah de first half.
Half time..is Port Vale 1 Brentford 0
Half time was spent dropping fatigue on de cameroon man telling him Et'o is shit and dat Drogba is de borse.
De man only laffing and he teeth have ah BIG space in it like ah picket fence. Man calling he goal post mout and all kinda ting...and he only smiling.
After de game de man say he want tuh come and lime with we tuesday! he was only watching FL! hard,hard, hard and showing he gap!
After de game, we meet up Birchall and ah do de interview...de man real cool, he say dat he eh see much more ah T&T dan Zen, 51 and de football grounds, but Yorke take him tuh Zen and 51 and dat he was shown much love dey by de woman dem, and de man face turn redder dan ah pomerac oui.
We take some more pictures and ah getting tuh interview His mother on tuesday too.
Tonight TriniWhiteBoy picking meh up and we going tuh ah fete wey socapro dj'ing.
Dem english men like tuh party boy.