Day start off real bad. ah end up at QPR Loftus Road and de damn Training was in Hayes! STEUPS!
Dere was dis real ugly ass woman ah thought she was Reggae fan so ah hail she out,,,RF!!!!But it was not he...too bad, ah wanted tuh buy him ah big screen TV!
Ah den got on de train and head tuh de Rennaisance Hotel..ah ask de driver of de 140 bus to please let me off real close tuh de hotel ..de man tell meh dey eh have no Hotel name dat amd ask wey ah from. Ah tell him Trinidad and de man de proceed tuh tell me de hotel name is RAY-NA-CENTS!
Oh Gard..so much for de Queen's English! steups.
anyway as soon as ah walk in ah see Jck and de team manager, tony |harford and some women talking so ah walk over and say: "Excuse me please, I am from de OFFICIAL team supporters club, The Warrior Nation and I would like to take a few pictures please."
Dey say ok and ah take 2 pictures ah dem...(doh worry eh Rotato Poti, ah take more ah jack later,jes fuh your viewing pleasure).
The team bus was a little late returning from de session, but as soon as de bus pull up ah ketch beenie man and take he picture..he was trying tuh duck, after all he could be ah poster chile fuh birth control eh..he so damn good looking!
Ah linked up with shaun fuentes and ah slide in de room wey dey was holding de Press conference...dey was Playing Trini tuh de bone over and over..and somebody use chewing gum tuh hang de T&T flag on de board with de adds, but it keep falling down so dey jes drape it over de corner...
De team walk in de room and ake seats facing de crowd and tony harford start de press conference.
But 4 man was missing..Dog, Shaka, Stern and some odder hard face man me eh recognize at all.
dwight was sitting tuh beenie right and on beenie left was jack and tuh he left was Harford.
Jack start saying at the beginning ah de campaign 3 hings were desired..tuh make de World Cup dat get done, 2 tuh draw england..dat get done and de third dat eh happen yet,,tuh beat england.
ah reporter ask him if he seriously feel T&T could beat england, jack tell de man we beating dem and dat all ah dem in de room go faster see god face dan see england beat up T&T!
(later on ah man ask me if dat was what jack really said..LOL) jack tell dem most ah we players does play dey, and dey know england players real good. dat dem english is household names in T&T and we football fans even know dem players blood type. me eh go Lie was kicksy and handle heself well...until...
A next reporter ask him about he FIFA worries and Jack say he eh worried..he is still ah FIFA VP and dat he here ent? De man ask about de ticket fiasco and jack handle him like dis:
"This is not de time tuh talk about dat..it in FIFA hands, render unto FIFA the things dat are FIFA's and unto T&T the things dat are T&T's!
we here tuh big up de warriors (my paraphrasing eh..no verbatim).
Dat said no more kinda controversial questions were asked of jack publicly!
Dey den ask beenie f he feel we go beat England, beenie more or less say dat is football and dey eh ahve no small teams again..dat de gap closing because of de good coaching and de amount of big coaches coaching so-called small teams..carrying their experiencs dey.
he said dat like in ah FA game..small teams does surprise bog teams..de small team play ah A gam and de big team had an off day. he big up england and dey contribution tuh de game etc. but he stop short ah saying yes..T&T winning, but he did say we will be very wll prepared and ready for all comers.
Dey ask Dwight what he thought and if the amount ah fame dat cming de layers way serves as distractions..Dwight say, he doh feel so, de fellas is pros and well grounded and ready tuh give ah good showing, dat de |warriors eh going dey tuh fun and joke, but tuh give ah serious account ah deyselves.
Dey ask him if he planning tuh make ah return tuh English ball, and he say nutten ruled out, but essentially he still have ah year left on his contract at Sydney and as soon as dis game against |Iceland done he flying back tuh take part in de championship game over dey!
|he say he has been training with MAn United to stay match fitt and whn he was dey 4 10 days recently he talk with neville, and Roonie and dem.
he say this is a historical time fuh de players and dey country and dey going out dey tuh represent T&T!when de reporter did ask Dwight if he making ah return tuh english ball,,,Stern John bawl out,,yeah Brighton!
Ah try tuh get ah team shirt from Adidas rep and de team and from Fuentes, but everybody bawl dey eh have none extra..and
wait til de end ah April!Me eh find it look too bad though. Ah take nuff pictures too.
Afert de press conference was over, nuff reporters hold down Jack and dwight and Tony warner, Birchall and Dog. Jones get call too. Most ah de players duck out though.
Tony warner real cool fellas, he promise meh ah signed Fulham shirt so we could use as a prize. He says he is very proud to be given the opportunity tuh rpresent T&T and says he is glad dat de fans eh thinking he is ah waggonist (ah tell him we does call Zmora and Samuel dat and ah explain what it meant).
Ah also spoke tuh latas fuh quite a while..de man say he so happy dat we make it, dat people were very wrong tuh ever question his committment tuh T&T, dat he real love he country,,and tell him fans called him LataPEE and yorke blight Yorke.
he laff and say there is so much more tuh dat story but he putting all ah dat in de past!
Yorke, Stern, Shaka, Jones, Carlos all posed in dey kit fuh meh tuh take pics.
Carlos say tuh tell everybody on de website tuh big up.
marvin andrews was held down in ah interview fuh about 1 1/2 hours...so ah went tuh eat lunch and frget he. Ha did hear him preaching tuh de reporters doh.
One more thing..ah overheard |dwight talking tuh BBC..he tell dem all dem pundits who saying T&T getting 4 and five from England joking, dat happening over he dead body!
gun talk from de captain fellas!
nice day..but very long....so until next time...Laters from cold ass London!
ps beenie also said forget samuel adn zamora, he gets emails from all kinda peeps who suddenly learn dey have grand parents or family from T&T.
He sticking with de fellas who get de squad wey dey is, but he add ah few tuh have ah look see.