Slept late got up, showered and hit de road. So ah meet Socapro and we do we thing...!
First stop was to de TV studio tuh do some last minute editing things..and to meet Mr, and Mrs. Birchall.
Dey really nice allyuh. Ah also met Birchall's big brother and his girlfriend.
We did an interview and ah ask Mr. B if it is true dat he tried tuh disuade Chris from representing T&T.
De man say dat is not true at all.
Dat chris used tuh watch Dwight play fuh Manchester when he was 10 and say dat he go play fuh T&T with yorke because his mum from dey!
Dey explain dat Mike Berry found ut about the T&T links and asked Deniss lawerence tuh approach Chris and ask him tuh play.
Ah ask mr. b again if de stories about he wanting chris tuh play fuh England instead ah T&T were true..de man say: "lets face the facts, my boy is 21 yars old, playing Division 1 football, he is not making the England side. Which father would not want his son playing international football, and now going to the World cup is fantastic."
His mom saud she was so proud of Chris and that the draw for the World Cup was beautiful.
Ah ask dem who dey want tuh win when we play england. Mr. B said he kinda ah sitting on de fence on dat one, but mum said she wants her son tuh win..ahh boy mothers eh!
Ah tease Birchall brother about all de girls he brother getting and he take it good..he say he want tuh make ah Zen lime with chris and Dwight!
Socapro went and buy 8 roti and ah give de Birchalls and de TV men some tuh eat..dey real enjoy it..it was de first roti fuh Mr. B and he son (ah cyar remember de man name at all), dey real loved it in trute..ah had tuh ell mr. b de paper not edible oui!
We went tuh de sprinbok and linked up with LP, behind de bridge, thane, rastafari, triniwhiteboy and ah bunch ah people...Socapro, lp and FL! dem get busy handing out fliers boy..dem UK crew earn dey pay.
After a drink or 6 we leave fuh de game,, de Birchall's were guests of Concacaf, so dey sit above we in an enclosed area,,we was in de East paddock..lime sweet fuh days.
All of ah sudden ah sweet looking brownskin ting say: "you is truetrini?" Ah smile and ah say yes..she say i is Corbie Chile...." fellas de ting sweeet fuh days..pics tuh follow on de warrior Nation website eh. she tell me she join we site because ah triniWhiteBoy..so she meet he fuh de first time tonight too. She already knew Socapro..everybody in london seems tuh know de soca P! especially BIG BAMSEE tings!
Boy,de crowd was nice...plenty red white and black..den some winer girls hit de field and start tuh wine down de place....X rated ting oui! Dem english and jakans was bawling! WINE fuh DAYS in ah few minutes..and dey dress up in dey carnival outfit and ting..some sweet looking tings eh..all colours, all races..really showing off we culture and people..did i mention de wining? WINE Girls!
Game start and before yuh know i,,like about 9 minutes dwight collect ah ball and rifle a shot...GOAL!!!! GOAL GAOL in dey arse..and de place gorn mad..me and triniWhite boy start tuh jump and wave like we mad no arse!
Listen eh, i is ah stern john backer..but he throw away ah sitter, and den did not hustle in de second half when he had ah chance. but de man real hold up de ball, and yuh coulda see dwight was looking fuh him.
De defence was good and seemed confident..we out hustle Iceland and make dem look sorf!
In dat stadium, everywhere ah look is sweet sweet trini tings..white ones, black ones, brown ones, chinee looking ones, dougla ones, indian ones, red ones..ah look at woman as much as ah look at de game so ah cyar comment too much on de players, other dan Birchall who real hustle and fight fuh every ball. yorke who was inspirational and Cyd gray who leave de ~5 left winger with ah little too much space at times...but Denniss marshall de left side real good..de man play sound ball.
Ah see dey talking but Iceland free kick..well me eh think is was inches wide from my vantage point and tuh me it seems dat shaka had a bead on it all de way! but it was brutually struck and if more on target would have been dangerous.
Me eh find Spann had his best game, but he had moments when he played well. Shakes shaky,,,ah eh know if it was nerves or de level ah ball doh. I need tuh take ah second look.
warner, though a really nice fella make some jokey clearances tonight..and he didnt have tuh make ah save!
latapy is latapy and it seemed dat dem icelanders know about he..becasue dey rough up de wee man tonight.
De crowd really enjoyed deyselves and de reporters all calling de T&T fans de warrior nation.
Dat is how much we peomote dis site and de Club!
All in all, another truely wonderful day and experience in london...dey really cyar beat we trinis at all nah!
sweet woman, de football team playd well afert a long absence, and ah meet plenty people who does lurk on we website.
including de Birchalls...dem does read here everyday!
