Well today ah said goodbye tuh dem Tv people fuh de moment, we plan tuh hook up in T&T if all things work out fuh dem regarding scheduling and approval.
Did ah little last minute shopping and gaping and pinch ah fat girl bamsee fuh good luck. Ah really wanted tuh rub she buddah belly, but de bamsee was ah better choice.
Ah had ah real good time as allyuh could tell from meh prior ramblings.
Socapro, FL!, TriniWhiteBoy, lp, behind de bridge, Thane, rastafari, corbie chile, carib-Briton, de Heath's and de Hamel-Smiths along with de Port Vale crew made dis trip ah real blessing.
it has been hectic but fun...setting up de warrior nation with dem fellas was easy! Dey real motivated, ah jes wish dey ahd more ah dem.
Am meet Birchall, interview he, and he parents and brother. Ah meet Port Vale Chris, Birdy, one-eyed-dog and de one and only Bill Bowers from BBc-Stoke and do ah quick interview with him. Ah talk tuh latas and he spell out his committment tuh de T&T cause, ah talk tuh yorke, Stern Shaka, Carlos, and tony warner and Jones K. dem fellas was real cool and accomodating tuh ah fan.
De Chairman ah port Vale send meh ah shirt and arrange fuh birchall tuh sign it fuh de warrior nation (it go be ah prize). Ah meet one ah de port Vale directors and he invited me tuh sit in de Director's box at a Port Vale home game.
Ah see real big bamsee ting dat does follow Socapro all around de place..one ah dem nearly give meh ah slip disc one night when she start tuh swing de engine..ah run..ah eh go lie!
Ah see FL! real hunt down ah nice young ting in ah white pants..and when ah confront his tracking, he deny it..but ah have pictures.
Ah hear behind de Bridge English accent and ah call him London bridge.
lp real cool, doh leh he hold yuh in no old talk doh.
Carib-briton is ah real cool young tess, going tuh college trying tuh make it..Big up youth, he know every west indian footballer in england it seems like.
TriniWhiteBoy drive all over de place, pay fuh flyers and transport meh tuh all kinda party ALL OVER LONDON! de man real cool!
Allyuh eh want nutten with rastafari! As soo as he see meh he say..truetrini ah have ah bone tuh pick with you. Ah say what brds? de man say yuh say yuh buying beers fuh everybody..so ah buy de damn beers..ent?
ah see nice trini woman wining down half naked in loftus road in de dead ah English winter..and ah feel warm, warm, warm!
Ah make ah documentary featuring de Warrior Nation in de UK with ITV 1 and we do radio, Tv and newspaper interviews..everybody want tuh know about Trinidad and Tobago. dis is ah good opportunity fuh de Government tuh cash in on!
Ah tired..ah run around like ah manic. Meh head hurt meh with nice woman and good football.
my trip was not in vain....especially since ah see T&T dust out Iceland live and direct!
Dis is truetrini, a member of de warrior nation signing out from London...back tuh life, back tuh reality...until June 2006!
