nobody's angel bring dis up in d touches match report thread. she generally said dat whenever a female say someting bout football she gettin quizzed like in a fireball interrogation. when man talk football, he know everyting so is no scene. can somebody please tell me WHY IS THAT???
after she bring up dat, i jus thought i hadda share one of my experiences where i got d biggest fight dong in history.
allyuh girl dey limin wit some fellas talkin football, world cup squads etc. a fella in d group jump up an bawl ,and i quote "buh how yuh does concede ah corner ahgain??", end quote. without d blink of an eye a nex fella in d group answered him. no shit up, no buss head, NOTHIN!!!
we talkin world cup squads now, an yuh girl make d mistake an bawl seedorf from netherlands. EH HEH!! who tell me say dat! bout three ah dem one time say " he playin for holland girl, waiz yuh scene dread?"
a nex one bawl "kill she dead she know football eh!"
my dear friends, holland an netherlands is d same f***in place .
i ask of u therfore, was dat fight dong justifed an why it is fellas feel girls shud not know or talk bout football.
trinicana, kanditt, jodie,nobody's angel and whoever female on dis board , lemme know if dis kinda ting ever happen to allyuh.
bless!!!