ah WONDER...why it is dat when people especially man KNOW dey ain't have nice teeth why dem does smile like ah crocodile ?
hear dey lyrics - ah tell ya meh week was full of excitement yes...and always with some man.
I in meh office today, sid down minding meh good business, when dis man from dey factory area pass meh door and say 'goodmorning'
ah reply back with a 5$ smile, cause from experience if ya giddem 10$ worth ah smile, first ting is 'oh she easy', so he get 5$. Ah continue meh business.
Next ting he in meh office and he invite he self tur sid down ...me ain't digging nuffin. all this time meh eye in some paper so i ain't really look at dey individual.
Man start up conversation bout how he hear i from dey caribbean and so on, and he like meh accent. still me ain't digging nuttin.
Something tell meh Cana look up. Hear nah, dey man put down ah smile like ah crocodile and meh eye focus on dey mouth area.
Dey man look like he bite ah gernade. Teeth scatter all over. Allyuh ever hold back ah laugh dat make allyuh fart ? Datz me today
Me ain't care if he hear it or not...is either meh laugh or me fart. ah choose dey latter.
I count 4 teeth - 2.5 untop and 1 at dey bottom. In meh mind " one tur brush, one tur floss and one fur style" ah was bout to go tur dey 4th one when dey phone ring. Ah tell him to dust it and when he get up ah focus on he ass...NICE ass eh but ah remember dey ole talk ah get in another thread and ah refocus on meh paper and dey call.
e-man ah hear ya loud and clear...ah go leave dem duttiness alone
