Coco...hear nuh, dat brings up another topic..
When you DO smile at some fellas they feel yuh want them to move in. DAT ah cah take!!
Girl I on a boat cruise fuh Caribana one year. I wid friends and family, yuh girl bade and powder so ah looking decent. You done know how dem boat cruises, nobody is stranger, you smiling and laughing wid all especially if de music sweet. Well, ah make ah mistake and pass a fella, ah bounce he when de boat pitch so ah say excuse meh and smile - all my teet is mine eh?
ay ay...de man muss be feel "excuse me' meant I wanted him to father children with me. De man attach heself. He staring, he smiling, he come offering to buy me drinks, food, diamonds, house, land...
ah say no, no, No, NO...ah stop smiling...
I go by de front of de boat, he follow, ah go by de back of de boat, he follow...
OH SHIMS MAN!
Meh friends start laughing at me because ah getting vex. He want to come whisper in meh ears....
And is a boat cruise so ah cah leave but more than once ah say let me go to a empty corner, when he come ah could dash he overboard. Nobody go see...
Some fellas, yuh cah smile at dem nuh...dey does get de wrong message...