Chatter yuh was busy girl!
Ah want to lime today eh? But ah have ting to do before ah get boof and en' up moving een by Cana and she done tell meh doh come in she house.
Dat snap yuh put wid de man in de water. Hear nuh. If I wake up in water and he dey half way drownin' is bawl I bawling eh?
Firse to begin, dat is NOT my husband so dat mean is ah outside man and dat mean I in trouble because I cah lie too good. So who ever dis man is have to GET OUT meh leaky waterbed before de huzzy tun de key in de lock.
Second to begin, I not a strong swimmer so what I doing in de water sleeping? Is one of dem sensory deprivation tank? I NEVER go in one. Ah had a pardna did have one in he house. Come telling me to try it. De ting look like a empty casing fuh a scud missile. It dark wid bout 2 inch of water. He telling me go een, and close de door.
Now...akse me dis ting.
I is a girl who like open air, space, freedom. Why I going in dis watery grave to deprive my sensories? Which pries' I kill? *steupse*
Anyway, where I was?
Yes Miss Chatter, go brave, keep de tread going. Doh mine dem fellas.
Cana! Coco! All yuh do de needful please. We going fuh a record! When SW cancel we visay, we going to terrorize some body else forum.
All yuh walk good!