well is Monday.
Ah wake up, bade and powder up. Put on meh black and white stripe pants suit wid de black crepsoles and a big green panama hat. Ah have meh red handbag and yellow parasol. Ah looking like a crawse between Martha Stewart and a douen.
Ah have de people credit cyard and ah going to shop.
Ah have all yuh lisses so once ah make meh rounds I will send all yuh everyting yuh akse for. I know dat if de company ketch deyself and realize dey cyard getting a full workout and dey come behine me, dat all yuh would step up and defen meh.
I have total and complete fate in all yuh. I will jes tell XYZ Inc. dat Rookmin, WestCoast, Dutty, Papa Gawd and Grande Man sen' meh to buy ting fuh dem. All I wanted was de moreno, bodice and two washecong fuh de chirren.
If all yuh doh hear from me dis evenin, you will hear from my sollysittor - Mr. Bob Boll and Associates.