I want to be a celebrity so ah could drink and drive while ah chooking cocaine up meh right nosehole an meth up meh lef one.
One time ah went in de rumshop an buy a case-ah beer because ah was havin a few people home by me. A beer buss open an de whole car smellin like lower Charlotte street. I frighten when ah spot a cruiser behine me. Ah say he MUSS smell dis configuration in meh lil putt-putt car so ah take a right turn to avoid de confrontation.
But look how Paris an Britney an Lindsay an Nicole an dem does bounce dong people, over run de neighbour poodle, get pull over, charge, lorse dey license, go in rehab, go in jail, come back out, take a puff, two snort an a drink an get back behine de wheel of dey 2 ton HumV and still make headline as celebrity.
Whappen, corbeau pee on me? Ah going an drink two beer an drive up an dong in front de police station now self. steupse