Ah doh want tuh jump and say anything, and de info is incorrect. Well hear meh nah, we all love Carlos, no questions about dat, but de people in T&T, dey does have ah saying when things don't go de right way fuh, dey does say blight, yuh need ah bush bath, jumbie following yuh and like yuh f**k ah bad thing and she blight yuh. Dis not ah post tuh pull ah joke on Carlos, de people dat spent some time home before going abroad and de locals should be familiar wid meh quotes are just made. Ah know in de game man does get injured and thing eh, cuz dat is part ah business, but damn dis 2 much man. Poor breddah, ah hope dey wrong on dis thread, bless up Carlos and Jah guide meh boss. Carlos boi, yuh suppose tuh know dis, but sometimes when we get de blessings from de man above and we forget him, and start being ah big baller and shot caller, he does things like dat tuh put us on check.
Ah know yuh does read dis forum, Supa post is different tuh de other members, although I know we have a lot of intelligent and clean hearted members here, Supa post does be different in many ways, cuz ah look at things from ah different corner. Any way Carlos, yuh know yuh seen sah, if yuh know yuh not dealing wid de boss in de right way, pull in ah corner and talk tuh him, it not 2 late. Trust meh it coming from ah yute dat know de big life and ah was put on check ah few years ago, fuh forgetting who is de man dat gave meh de money and rank dat ah have, thank de lord ah have Christian parents. Meh parents gave meh ah simple line sah, dey tell meh go in ah corner and talk tuh de man above from yuh heart and every thing will be nice again. Well hear meh nah, it is not nice again nah, it highly, highly blessed (give thanks). Some times we get money, big house, nice car, women and a lot of material stuff, and we get carried away in de system and forget who is de real boss round here. So de only way tuh get yuh attention, he does put ah spoke in yuh wheel, fuh yuh tuh ketch yuh self. So doh think fuh ah minute dat Carlos cah be in dis situation, he is ah human being like all of us and he cud be Pele, he still have ah man tuh give thanks to, and if he don't, well we know de rest. Supa is not God, but ah just find it very strange dat dis man suppose tuh light up de EPL, and as far as injuries, is problem after problem, nah man something wrong some way. We cah forget de man above at all, or else he will put ah temporary hurt on yuh, member meh told yuh. Ah know better now, so everything well blessed. Dis might not make sense tuh some and tuh some dey will shake dey head and say yes Supa, I have been there before. Wid all dis, ah hope thinks go well and yuh cud still come back and be ah big player, as we alll expect yuh tuh be, bless, bless Carlos. HIGHLY BLESSED.