I was tinking....one way to settle plenty disputes, is for dis forum to have we own soccer picnic. Leh we plan it from long in advance, so men could start renting dey bus from early.....and leh all de mouters come wid dey side. Leh we see who could really play football. Who living too far to bring side could fly ene and fall ene on any team....and make sure and register under yuh user-name so we could see all who is real lalla and aint trying to disguise deyself. I say one year from now is ah good call. Sorry local base, but we hadda settle dis ting one step at ah time. Leh we deal wid de US fus, den we could do de same ting in Trini. It goh be de Soca Warriors Forum picnic.
Jes ah idea, look at de bigger picture
Yuh feel if Supa in bad shape, condition or is ah shit snake, ah go register as Supa? Yuh must be mad or what, all yuh eh go come and make fun ah meh fuh ah year straight nah
. Hear what is Supa plan, ah does play meh ball and ah played up tuh ah certain level, but if ah make de trip and ah not ready, hear de scene, ah go ask certain members dat ah does par wid(Berris, B n S, Dinho, WC, JC, tuh name ah few) and de one dat not going ah go register under he name, den go and play meh shit on de field. So next day when all yuh start tuh fack up men, all yuh go be saying damn Dinho all dat mouth yuh have and yuh is ah real shit snake boi
. However, good idea doh, dat not only good fuh de ball, but fuh de fake bad men on de forum, ah cud meet dem and still drink ah juice wid dem. Cuz is nothing, is all about love, fun and looking fuh we food
.
HIGHLY BLESSED.
