Thanks allyuh....
Be safe eh, ah want to hear all ah allyuh bachannel and ole talk nex year
pecan how ya making out with dese continuous snow storm boy
talk about pressure on the roads dis morning?
ah take ah week off from today, and ah say to meh self lemme go to staples and get meh stocks for dey new year, but dey time i reach corner and clarke and oxford streets which is 20-25 mins from me - watch dey snow plow 4 cars in front ah meh, ah tantie driving like she on reverse in front ah meh and ah mack truck behind meh, dey WINTER tire dat cost meh almost 300 ah rubber skating like ah going for winter olympics ah start to cuss HARD, ah didn't care who hear meh.
Ah reach by dey traffic lights by Dundas and ah Jamaican fella pull up along side meh (he had ah flag hengin on dey review) ah roll down meh glass, and hear he 'sista!' before he could continue ah bawl 'boy wha dey fack we doing here?' dey man buss oui...steupse! He gone!
Ah take meh time and gone ein staples -surprisingly hadly anybody in dey, ah buy meh stocks (ting cheap no arse) and ah start to walk out dey people door when meh brain tell dey ress ah meh body to go across to Walmart. No lie ah actually start walk towards dey people building and meh right eye start to count how much car it have in dey big carpark. After ah reach 8 cars ah say Fack dat eh!
Ah jump back ein meh car to head home, ah see gas gone down again, ah full meh tank, wash meh windscreen and dem and gone home....
Meh fridge full, meh smaller fridge fuller wid drinks, meh mudda sen' some pastelles and ah black cake for meh....Dey only time ah leaving this cave is Christmas day when ah going by meh boss to eat out he house...after dat ah not leaving dis cave until Sunday..
