Air Canada drops POS flight

[ricky]

Air Canada drops POS flight

http://www.guardian.co.tt/business1.html

piece of garbage airline......
these airlines pay a global price for Jet B/A?
cause these bastards was flying to Venezuela to fuel up after POS anyway
For the last 2-3 years the flights went TOR-POS-VEN-TOR

ah wonder if they keeping the Venezuela flight

[TriniCana]

ricky i just heard about this, and ah thought it was rumored. So now ah figure it's not.  But to tell you the honest true me ain't care. Dey damn expensive and their in flight service/counter service does always leave me wondering who dey neck paying dey salary each month.  one time ah had to tell ah CSR in advance dat dey way she screamed at dem people who was in front ah me bout dey luggage doh try and do dat wid me.

I'll say it again....caribbean airline, doh mind some ah dem flight attendants need to lose weight and some ah dem need to learn how to smile, is still dey best in dey sky in my book. Dey always on time (well up to now) dey always have specials (dat ah never get) and dey meals warm. If dey pilot catch ah glad, ya could reach half ah hour earlier dan dey original arrival time.

Dey ony ting dat does upset me bout them is dese north american movies dey does want to show ya. show something local nuh....ah little back in times sugar cane arrows, ah little caribbean festival something, st lucia jazz festival, sean thomas jazz on dey greens. Infact show ah damn local commerical nuh? 

let dem new visitors get ah taste of what to expect when dey reach dey caribbean sky and or dey expats beat up dey chest ah little bit nuh. doh talk for dey music...lawd! 9 KAISO songs on #9 station in ah loop. Now tell me dis ting.  Somebody cyah bun ah mp3 CD wid umpteen song on it for some ah we who forget dey ipod in dey car and is only when dey reach dey terminal...is cuss down dey line???

steupse.....ah still love meh caribbean airlines

[weary1969]

Somebody need 2 destroy dat cassette dey does b playin 4 truth. I eh travel CA yet because meh travels try up and where I plan 2 go is LIAT in meh tail I eh likely 2 reach d US B4 09 and is DISGUSTIN AMERICAN

[TriniCana]

is like ah was telling somebody dis morning bout meh travels back to Canada dis rounds....
dey ticket ah had was ah 'thank you' ticket, so ya know is dem who pay first get first peference eh.
so after dem gone ein, me and ah fella remain in dey terminal until dem behind dey counter say dey ready for we.

ay ay i walk ein dey plane and ah spot 2 out of dey 4 flight attendants that ah normally see on dey flights, so ah say to mehself nice ah getting ah window.  STEUPSE....flight full.

See me sid down on ah asle seat. but ah say to mehself lucky ting me ain't dey man, cause he get ah seat between ah big oman and ah long leg fella. so ah settle for with what ah have.  next ting BAM, ah feel like meh shoulder dislocate jus so. Me ain't no american footballer to have dem kinda spread out shoulders...ay ay. 

Before ah could even watch to make sure meh elbow in dey same place ah leave it, BAM again. ah say NAH, ah tun roun jus in time to see ah big hip of ah oman walking down dey asle like she in ah hurry......is den dey pilot say 'ah taking off - allyuh sid down quick'

i ain't lying....meh left shoulder hutting meh bad.  dem fackers need to lose weight man. eider dat or dey widen dey plane for caribbean oman and dem. dey cyah expect to design dey same kinda plane for Sweden Airlines and Caribbean Airline man....dat ain't right   And den when dem serving dey meal wid dey cart is dey same time somebody wanna go use dey latrine. next ting man squeezing ein my leg space trying to over take dey cart. hear nuh, if it wasn't for dey little chile behind meh seat i woulda leggo so much f-ing in he arse eh.....ah still vex.

ah going back in August...

[TrinInfinite]

the last time i fly air canada to trinidad was donkey years ago when my father was working for them, so i ent really care, skyservice, zoom and air transat cheaper

God is de BOSS....