me eh shame (well ok I kinda shame) to say ah dunno how to play de trinbago staple called all fours
Yuh have some company here. One time back in school days, me and some pardnas went down Los Iros over de Easter holidays. Dem was some rell card peong. Dey wanted tuh play all fours and dey was one short, so dey ask meh tuh play. Ah tell dem me eh know how tuh play. Dey say dey go teach meh. Ah say awright. After a few minutes taking some lessons, game start. On meh first play ah get meh Jack hang, and dat was de end of meh all fours career. Ah colleck cuss whole night 
.
tallman, dat cool but what about the man who say he COULD play but really can't..
everybody come across that kinda fella..
wait for when yuh in mid-tournament to show he true colors, and have yuh asking questions like:
"wha yuh throw jack dey for jed?"
"yuh dong to or wha? how yuh running trump so?"
"yuh eh readin meh signal or wha?"
"ah tell yuh is only ah ten ah have in dat and yuh still throw clubs?"
