Ah noticed something doh, not dat it real important, but from de votes and past observations. Ah wonder how come out ah all de females on de forum, it look like Weary does get all de opposition? Ah not jumping tuh her defense, cuz fuh all yuh know, she might be real close tuh de massive. Ah know that we do have some pretty and attractive females here on de forum, but is only poor Weary ah noticed does get all de slam. If ah remember correctly, as a quick example, ah while back, ah male member here did cuss de woman out real bad. Not that Weary and I is personal friends, but all yuh know ah does always be observing things around here, so ah just thought ah share my observation wid de massive. All yuh doh get de wrong idea doh, right now de Supa very , ah not trying tuh start nothing, it is, what it is and ah saying it as it is, seen. Well it look like is special love for the rest of de females and presshah fuh Weary . RIP MJ.
yuh outta timing with that talk bredda..
when that scene play off, men ups and address that situation one time.
weary must get pong because she is the only one who does be spamming the board on ah regular.. look westcoast does get that same pong and he is ah man (i think).
Lawd, as de old people does say, mouth open and torry start tuh jump out. Well Breddah, doh show off yuh guilt nah, cuz Supa wasn't only talking bout you and Weary, so paddnah wipe de guilt off yuh face. Yuh see what ah mean, one person show up already and start tuh defend he self. Ah tell all yuh ah doh lie about my observations, trust de Supa when he talk.
Any way doh make dis in to no small argument, cuz you is one of de few dat does cuss out Weary. Dis is just an observation, I eh talking no swipe at you personally, cuz although yuh cool wid I, ah will call yuh out just like dat and still be cool wid yuh. Yuh know dat is how ah does operate paddnah, so relax. If ah was concerned about you getting upset, ah wouldn't have said what I said. If yuh vex, more power tuh you fellah. Wid me, it is what it is, simple as dat. Read yuh post again Dindho, observe what you said about WC, how does dat have any comparison tuh de female (Weary), providing dat WC is ah man. Come on Dinho, ah know yuh smarter dan dat man.
RIP MJ.