so wdf nobody aint go???
wam to bm an sm dem always goin dem kinda ting
Dread.....understand de scene. De only reason i able to make it..is cuz i eh working now. Most locals go be in work or have other commitments. Buh seriously......yuh does reach de point of disgust sometimes. We done eh make no plan for dis period......even doh we did know long time we eh playing in de Gold Cup. Yet de powers dat be eh make no kinda plans for it......den scramble someting last minute..and dat and all fall through.
It come like....yuh have yuh driving test buh yuh feel sitting down playing need for speed good enough. Den two days before yuh driving test...yuh decide to go and find a driving school and actually practice on a real car. Buh when yuh gone to de driving school....yuh find de money is too much..so yuh talk to de instructor....and he tell yuh come back in de evening..and he go work someting out for your pocket. When yuh reach back......yuh see he have a donkey cart inside de L turn box and telling yuh jump in and practice yuh L turn. And den on top of dat.....when yuh pull on de rope to make de donkey move backward......it eh want to move...why? It run out of gas...so you hadda go and dig up and find some bush fuh it.
Dis is rel nonsense. Ah mean show some urgency nah. We did know we wasnt playing in Gold Cup even before de Hex start. You want to tell me dem eh realise de importance of having at least some game of merit during this time? You want to tell me nobody coulda make some kinda preparation? I wasnt exactly satisfied with the Scotland tour..but as i mentioned...it better dan nuttin. For me personally...that Scotland tour instead of Gold Cup was like i gone in Ruby tuesdays and get a goat roti. Den as i deciding to eat de roti cuz i hungry..somebody come and snatch it from me..and give me a pack of stale crix to eat. Yes...it might be a good work out for the U-20's....thankfully they benifiting. Buh wha de ass.....wha bout de seniors? Even if yuh want to say Jack give up on de team..at what point did he give up? Hadda be before de hex start.