That goal we conceded started from the corner.
The corner get conceded...ALL MAN JACK TURN DEY BACK and start joggin back to de middle of de goal.
Ita;ians spot dat slackness, take de ball short....de man had time to colleck de ball, look up, brush he teet, floss, gargle, rinse, spit out, take a look in de mirror to mek sure everyting lookin cool, DEN chip de ball to de defender runnin een to butt it past a cyatspraddle Samuel.
Doh even talk bout Molino joggin een to trow he leg out and braksin same time when de ball done nearly on de fella head and Gay trackin back wit de defender but decide dat de defender faster, bigger, and stronger so give he a lane to go tru.
ABSOLUTELY SHOCKING PATHETIC DEFENDING. Yuh cyah even call dat defending...me eh know wha yuh does cal dat. Maybe...."Heh.....tek dat" might me more accurate.
De commentator bawlin all de time bout caribbean teams and how he does have to tell dem bout CONCENTRATION.
Maybe wit we players, CONCENTRATE mean Orchard Orange Juice.